Холивудскиот актер Џорџ Клуни и неговата сопруга, адвокатката Амал Клуни, беа во центарот на вниманието на црвениот тепих на Филмскиот фестивал во Венеција. Амал блесна во елегантно издание, додека Џорџ направи вистинско шоу кога „позајми“ фотоапарат за да го фотографира колегата Адам Сендлер.

Славниот пар прошета на црвениот тепих пред премиерата на новиот филм на Клуни, „Џеј Кели“ (Jay Kelly). Амал ги освои погледите во тесен фустан со елегантен шлиц, додека актерот се појави во класичен црн смокинг со бела кошула и пеперутка-вратоврска. Двајцата позираа насмеани пред фотографите, држејќи се за рака.

Во еден момент, Џорџ Клуни со доза на хумор му го зема фотоапаратот на еден од фотографите и го искористи за да го слика Сендлер на црвениот тепих, на општа забава на присутните.

Да потсетиме, актерот претходно го откажа своето присуство на прес-конференција поради инфекција на синусите, но тоа не го спречи да се појави на свечената премиера.