На „Булевар Македонија“ кај Рампа во општина Кисела Вода, според жител, цел месец „зјае“ длабока дупка среде улицата, но за жал се уште нема реакција од Општината да ја пополни улицата, која директно ги загрозува велосипедистите, возачите на мотоцикли и автомобилите кои минуваат оттаму.

Жителот кој ги испрати фотографиите до нашата редакција вели дека оваа длабока дупка скоро еден месец ја „краси“ улицата, која како што вели, е навистина прометна во текот на денот.

„Дупкава вака стои еден месец, иако не изгледа толку длабока на сликата, таа е огромна. Јас возам мотоцикл и додека градоначалникот Орце Ѓорѓиевски веќе води кампања за Град Скопје, доколку остане дупкава непополнета некој ден главата ќе ја скршам додека возам“, вели жителот.

Тој побара итна реакција од Општината и нејзините служби да ја пополнат дупката за оваа улица повторно да биде безбедна за сите учесници во сообраќајот.