Редок фосил на млад тираносаурус рекс е откриен во Северна Дакота, Америка. Откривањето на фосилот, кој го доби името „Тин Рекс“, во вторникот го објави Музејот за природа и наука во Денвер, каде фосилот ќе се проучува и изложи, пренесува „Ројтерс“.

Во јули 2022 година, браќата Лиам и Џесен Фишер, кои тогаш имале седум и десет години, заедно со нивната братучетка Кајден Медсен и таткото Сем Фишер, играле потрага по фосили, а големата коска испакната од земјата ја забележале Лиам и неговиот татко.

„Тато праша: ‘Што е ова?’, а Џесен рече: ‘Тоа е диносаурус’“, се присетил Лиам, кој сега има девет години.

Сем испратил фотографија од нивното откритие на палеонтологот Тајлер Лајсон, кој е вработен како куратор во музејот во Денвер. На почетокот на испитувањето не се знаело дека се работи за тираносаурус рекс, но се сметало дека е тревојаден диносаурус.

Тираносаурус рекс, кој шетал во западна Северна Америка, е еден од најголемите месојадни диносауруси. Откриениот тираносаурус се чини дека имал помеѓу 13 и 15 години, што се смета за период на адолесценција, бил долг 7,6 метри и тежок 1.600 килограми.

„Комплетноста на скелетот останува нејасна бидејќи многу коски се уште се вградени во парчето карпа од три тони, што сега се проучува во музејот. Се чини дека голем дел е од черепот, коска од колкот и некои пршлени покрај ногата“, рекол Лајсон.

Можеби најголемиот познат примерок на тираносаурус рекс е оној со име Су во музејот во Чикаго, кој е долг 12,3 метри. Инаку, тираносаурус рекс живеел пред околу 67 милиони години, блиску до крајот на периодот на креда.