На денешен ден пред девет години, скопските села Стајковци, Смилковци, Сингелиќ и Арачиново беа погодени од катастрофални поплави, во кои животот го загубија 22 луѓе.

Дотогаш незапаметеното невреме започна во попладневните часови, кога целиот Скопски регион беше погоден од обилни врнежи од дожд и силен ветер. На 6 август 2016 година за 24 часа во Скопје наврнале 92,9 литри на метар квадратен, а во текот на првите два часа од почетокот на невремето имало повеќе од 800 громови.

Во текот на ноќта биле евакуарани околу илјада граѓани.

Луѓе од целата држава, координирани од Црвениот крст, кризниот штаб и надлежните институции, во наредните денови се солидаризираа за собирање на најнеопходната помош за настраданите, а 8 август беше прогласен за Ден на жалост.

Управата за хидрометеоролошки работи во извештаите по невремето тогаш информираше дека на Зајчев рид – главната метеоролошка станица во Скопје, бил забележан рекорден интензитет за петчасовни врнежи од 84,5 милиметри.