Американскиот бизнисмен Пол Кауфман му предаде на Медицинскиот универзитет во Виена парчиња од череп, за кои се претпоставува дека му припаѓаат на познатиот композитор Лудвиг ван Бетовен, пишува „Би-би-си“.

Кауфман ги нашол фрагментите во 1990 година, во мала кутија во семеен сеф. Се верува дека праправујкото на Кауфман, виенскиот лекар Франц Ромео Селигман дошол до фрагментите во 1863 година, кога коските на Бетовен биле ексхумирани за проучување.

Ректорот на Медицинскиот универзитет во Виена, Маркус Мулер изјавил дека најважно е да се постапува со посмртните останки на етички одговорен начин. Тој посочил дека се работи за изнаоѓање правилен баланс меѓу разбирливиот јавен интерес и почитувањето на починатото лице.

Кауфман изјавил дека се чувствува многу привилегиран што може да ги врати парчињата од черепот на Бетовен таму каде што припаѓаат. Има вкупно десет фрагменти, меѓу кои и две поголеми парчиња – едно од задниот дел на главата и едно од десната страна на челото.

Австрискиот судски лекар Кристијан Рајтер изјавил дека фрагментите се навистина вреден материјал, за кој се надеваат дека ќе продолжат да го истражуваат, со цел да откријат дали, всушност, се работи за Лудвиг ван Бетовен.

Композиторот е роден во Бон, Германија, во декември 1770 година. Тој страдал од лошо здравје во текот на целиот свој живот и починал во Виена, во 1827 година. Наводно, тој побарал неговото тело да биде проучувано по неговата смрт.