Турнејата „Доживети стоту“ 2024/25 по повод 50 години од формирањето на „Бијело дугме“ претставува едно од најважните музички настани во регионот. Оваа јубилејна турнеја започна на 11 мај 2024 година во Сараево, местото каде што бендот е основан. Концертите (планирани 50) веќе се закажани во сите поголеми градови на Балканот и во дијаспората. „Слободен печат“ имаше привилегија да присуствува на ваков спектакл, заедно со државната Австриска Телевизија ОРФ која го снимаше целиот концерт, а е предвиден и краток документарен филм.

Присутни беа сите клучни членови на бендот, од мајсторот на гитара Горан Бреговиќ, вокалите Ален Исламовиќ и Младен Војичиќ Тифа, клавијатурите ги свиреше Оги Радивојевиќ, кој е долгогодишен соработник на Горан Бреговиќ, а на тапаните беше Џиџи Јанкелиќ.

Концертот во Австрија, поточно во арената „Мултиверзум“, беше закажан за 9 ноември 2024 година, но бидејќи билетите за првиот концерт беа распродадени во рекордно време, организаторите Дејан Божиќ и Драган Зујевац одлучија да организираат уште еден концерт.

Специјални гости на овој спектакл беа групата „Плави оркестар“, кои настапија во првиот дел од концертот и уште со првите тактови на своите хитови ја кренаа публиката на нозе, која ги пееше заедно со нив сите познати хитови како „Суада“, „Подобро да си пијан“ и многу други.

Атмосферата дополнително се вжешти кога на сцената се појавија мајсторите и легендите на рок сцената на Балканот, предводени од легендарниот Горан Бреговиќ и Младен Војичиќ Тифа. Тогаш започна вистинската журка која траеше речиси 3 часа. Се изведуваа сите најголеми хитови како „Липе цвaту“, „Ако има Бога“, „Не спaвaј мала моја, музика док свирa“, но кулминацијата достигна точка на вриење кога Ален Исламовиќ излезе на сцената и ја запеа „Пљуни и запевај моја Југославијо“. Сите од 7 до 77 години беа на нозе, а во првите редови пред бината се развиорија знамињата на СФРЈ како во старите добри времиња. Иако се веќе во сериозни години, „Бијело дугме“ сѐ уште ги изведуваат своите концерти на највисоко ниво и со истиот жар.

На крајот, двата бенда излегоа на сцената и ја изведоа песната од хрватската пејачка Тајчи „Хајде да лудуjeмo“, што беше историски момент, бидејќи овие два бенда, иако од Сараево, никогаш претходно немале заеднички настап на иста сцена.
За достигнувањата на двата бенда е излишно да се трошат зборови, тоа се вистински музички легенди на поранешна Југославија кои приредија вистински спектакл полн со класици и незаборавни музички моменти.