Во „Мтс Дворана“ во Белград се одржа јавен час по рокенрол! 

Лидерот на „Атомско склониште“, Бруно Лангер, Бора Ѓорѓевиќ, Тифа, Браќата Јелиќ, Ѓуле – „Ван Гог“, Јурица Паѓен, Чипи од „Освајачи“ и Ѓорѓе Давид, со здружени „рокенрол сили“ одржаа незаборавен концерт пред публиката во Белград во чест на првиот пејач на легендарниот бенд – Серѓо Блажиќ, пишува српски „Телеграф“.

Под името „Серџо сè уште живее“, овој внимателно подготвен, ексклузивен концерт беше реализиран во чест на пејачот Серџо Блажиќ, кој како фронтмен на овој бенд од Пула, одбележа многу значаен период во развојот на популарната група, од основањето на бендот во 1977 година, до неговата прерана смрт во 1987 година.

Пејачот и гитарист Бруно Лангер, фронтмен на „Атомско склониште“ ги изведе најголемите хитови и некои песни кои одамна не биле отсвирени.

„Ви благодарам од сѐ срце што дојдовте вечерва“, ја поздрави публиката Лангер на почетокот на концертот, видно задоволен што големата салата беше преполна (распродадена) и ја започна рок одисејата со песната „Тајна”.

Концертната атмосфера го достигна својот врв, кога на сцената излезе лидерот на бендот „Ван Гог“, Звонимир Ѓукиќ Ѓуле, кој прво го изведе познатиот хит „Девојка број 8“, а на тоа се надоврза со една од најпрепознатливите песни во историјата на рокенролот „За љубав треба имат душу“.

Она што ја воодушеви публиката беше моментот кога Ѓуле пред заедничката изведба на песната „Не цвикај генерацијо“ на сцената ги донесе сите деца од публиката, кои со доаѓањето на концертот на рокенрол великаните станаа и ќе бидат новата движечка сила и надеж на локалниот рокенрол, но и на целото општество.

Кон крајот на песната, Ѓуле виде две момчиња во публиката и веднаш ги донесе на сцената да го пеат рефренот со групата.

„Има ли уште ваши врсници? Слободно излезете на сцена сите. За ова вреди да се живее, оваа младост. Двајцата витези на рокенролот се тука“, рече Ѓуле, а потоа пристигнаа уште многу млади луѓе на сцената.

„Добре дојдовте во храмот на рокенролот. Вечерва не сум овде на сцената како гостин, туку како голем фан на кој му се исполни сонот да пее со „Атомско склониште“. Се сеќавам со колкава желба сакав да ги гледам кога бев мал во домот на ЈНА и едвај чекав да почне конецртот. Таа музика нè воспита“, изјави Ѓуле.

Концертот заврши со заеднички историски настап на сите изведувачи на песната „Не цвикај генерацијо“ , а ќе остане во сеќавањата како единствен спектакл, кога регионалните рокери од висок калибар одржаа тричасовна лекција по рокенрол.

„Ова е песна која трае низ вековите и им припаѓа на младите кои вечерва стојат пред нас. За вас“, рече Ѓуле, а Бруно Лангер на крајот се поздрави со публиката во Белград.