САД и Европската Унија  одлучија да ги укинат сите царински давачки за одредени нивни производи, вклучително и за воздухопловството, изјави вечерва претседателката на Европската комисија Урсула фон дер Лајен по средбата со американскиот претседател Доналд Трамп.

Двете економски сили одлучија меѓусебно да ги елиминираат царините за низа стратешки производи, вклучувајќи аеронаутичка опрема, одредени хемикалии, полупроводници, одредени земјоделски производи и критични суровини, изјави таа за новинарите во Шкотска каде што се одржа состанокот.

Како што додаде, ЕУ ќе купи големи количини енергенси од САД за да го замени увозот од Русија.

Ќе го замениме рускиот гас и нафта со значителни купувања на американски течен природен гас (LNG), нафта и нуклеарно гориво, во износ од 750 милијарди долари во текот на три години, рече Фон дер Лајен.

Разговорот се одржа пред рокот на 1 август што го постави Трамп. На ЕУ ѝ се закануваа царини од 30 проценти.