ФК Вардар: Очекуваме дека управата на ФК Воска ќе дозволи влез на нашите навивачи во Охрид
Во недела на 23 април од 16.00 часот ќе се игра дербито од 25 коло во Втората македонска фудбалска лига меѓу Воска Спорт и Вардар.
Препорачано
Моментно двете водечки екипи во шампионатот се едни од главните кандидати за влез во прволигашката елита. Воска Спорт е на првото место со 59 бодови по четирите победи во низа, додека Вардар кој има пораз и реми на последните два меча е второпласиран со 56 бодови, еден повеќе од третопласираниот Гостивар.
Од ФК Воска Спорт информираа дека е забрането присуство на гостински навивачи за дуелот кој ќе се игра на стадионот „Билјанини Извори“.
ФК Вардар очекува дека управата на ФК Воска ќе постапи согласно спортската здрава логика.
– Фудбалот се игра за навивачите. Во недела, го играме најважниот натпревар, против екипата на Воска. Како вистински домаќини, секогаш сме правеле напор, заедно со нашата навивачка група – Комити Запад, да обезбедиме присуство на гостински навивачи, на нашиот стадион. Затоа, очекуваме дека управата на ФК Воска ќе постапи согласно спортската здрава логика и дека ќе дозволи влез на нашите навивачи на стадионот во Охрид, бидејќи сите сме свесни дека постојат објективни услови за споредување на таа одлука! Како клуб, целосно го подржуваме барањето на нашите навивачи. Сметаме дека тоа е најмалце што можеме да направиме, за луѓето кои целиот свој живот го посветуваат на клубот. Заедно сме во оваа борба, до крај! Се гледаме во Охрид – стои во соопштението на ФК Вардар.
