Фудбалскиот клуб Шкупи веќе се фокусира на следната натпреварувачка сезона 2025/26 промовирајќи досега доста нови засилувања ова лето.

Шкупи се засили со млад и надежен дефанзивец, Емре Кадри кој доаѓа од академијата на Адана Демирспор. Потоа, од следната сезона дресот на Шкупи ќе го носи Адонис Милај, 20-годишниот дефанзивен играч од средниот ред, доаѓа од академијата на Борусија Менхенгладбах, каде што играше за тимовите до 17 и до 19 години, додека минатата сезона беше дел од СЦ Сент Тенис во Германија. Воедно е и поранешен репрезентативец на Косово до 19 години.

Клубот го промовираше Максимилијан „Макс“ Гроте, 22-годишниот германски голман кој се приклучува по развојот во младинските категории на Мајнц 05 и СВ Вехен Висбаден, и со значајно сениорско искуство во ФВ Енгерс 07 и Рот-Вајс Кобленц, каде забележа над 40 настапи.

Нов играч е Андреј Ричков, 26-годишниот централен дефанзивец кој собра вредно искуство во Првата македонска лига играјќи за Воска Спорт. Ново летно засилување е и Малик Кадир Хајвали (20), германски играч на позицијата десно централен крилен напаѓач кој во сезоната 2024/25 играше во Оберлига со ТуС Мехтерсхајм.

Иван Николоски (22) е нов голман на Шкупи, со меѓународно искуство како поранешен член на младинската репрезентација У21. Син на поранешниот македонски репрезентативен голман Јане Николоски.

Ринор Ајдини исто така официјално стана нов фудбалер на Шкупи, минатата сезона беше дел од ФК Гостивар, а претходно беше дел и од Тетекс Тетово, Кадино, Хрватски Драговољац и младинскиот тим на Работнички.

Последно засилување кое беше промовирано во изминатиот период е Сухејл Мухарем кој ги направи првите фудбалски чекори токму во Шкупи. Десното крило претходно настапуваше за Ренова, Работнички, Струга, Скендербеу, а последен клуб му беше Фероникели од Косово.