За в недела од 20.00 часот на Националната арена „Тодор Проески“ во Скопје е закажан натпреварот од второто коло во Првата македонска фудбалска лига помеѓу екипите на Вардар и Пелистер.

Главен судија на овој меч ќе биде Игор Стојчевски од Скопје, а битолскиот клуб е изненаден што за овој дерби меч делегиран е судија од главниот град. ФК Пелистер во своето денешно соопштение вели дека на Стојчевски му се наметнува директен притисок пред најголемиот натпревар во мак-фудбалот.

– ФК Пелистер целосно го одобрува начинот на кој најголемото македонско фудбалско дерби е претствено – со вечерен натпревар, две навивачки групи на нашиот најголем стадион и убедени сме дека со помош на свесноста на двата клуба, дербито ќе биде во фудбалски амбиент и без инциденти.

Исто така сакаме да ја апострофираме нашата целосна доверба во структурите и професионалците во Судиската комисија при ФФМ, но изненадени сме од делегирањето на скопски судија за натпреварот од второто коло на Првата фудбалска лига меѓу Вардар и Пелистер. Ретко, скоро никогаш, тоа било случај и се прави лош исклучок кој не им помага на клубовите, а ни на судијата Игор Стојчевски и неговите помошници. Сметаме дека постоеше широк избор на судии кои не доаѓаат од Скопје или Битола, а можеа да бидат делегирани за овој натпревар. Ниту на одличниот судија Стојчевски не му се прави услуга, туку му се наметнува директен притисок пред најголемиот натпревар во мак-фудбалот.

Веруваме дека треба дополнително да се размисли при вакви делегирања, за професионалците да не се стават во незгодна ситуација и под огромен притисок и да не се остави простор за сомнеж кај јавноста и навивачите. Нека биде дерби за пример на мак-фудбалот! – стои во соопштението на ФК Пелистер.