Физичарите во нуклеарниот истражувачки центар ЦЕРН во Женева претворија олово во злато, за време на судир на оловни јадра со брзина речиси на светлината, а конверзијата на оловото во злато беше измерена со помош на нов механизам, објави организацијата.

Се забележува дека нема да се создадат „прекрасни количини злато“.

„Судирите со висока енергија на оловните јадра можат да создадат плазма, за која се смета дека го исполнила универзумот милионити дел од секундата по Големата експлозија. Ова веројатно довело до формирање на материјата каква што ја знаеме денес“, тврдат научниците.

Тие забележуваат дека кога оловните јадра се на судир во тунелот долг 27 километри на акцелераторот на честички LHC, многу почесто е тие да се разминат за влакно.

Интензивното магнетно поле на јадрата може да предизвика вибрации на нивната внатрешна структура и исфрлање на мал број неутрони и протони, се објаснува во соопштението, пренесува Swiss Info.

„За да се произведе злато (јадро со 79 протони), три протони мора да се отстранат од оловното јадро во зраците на LHC“, соопшти ЦЕРН.

Сепак, вкупната количина беше трилиони пати помала отколку што би било потребно за производство на едно парче накит, што ги намали сите надежи на алхемичарите, се вели во соопштението.

„Златото постои само дел од секундата. Сонот на средновековните алхемичари можеби технички се остварил, но нивните надежи за богатство повторно се разбиени“, соопшти ЦЕРН.

Организацијата го опишува своето откритие во рецензирана статија во списанието „Физикал ривју џурналс“. Оваа работа се спроведува од 2015 година во експериментот „Алис“.