Градежните фирми, но и останатите дејности на кои деновиве им беше изречена забрана за работа поради утврдено непочитување на препораките за топлотниот бран можат да ја обжалат одлуката бидејќи е препорака од страна на Владата, а не наредба поткрепена со закон. Градежните фирми со кои контактираше „Слободен печат“ велат нивните адвокати веќе подготвуваат жалби и дека наскоро очекуваат правна разврска за цела работа. Адвокатите велат дека нема законска основа на фирмите да им се изрече забрана и дека можат  истата да ја решаваат на суд. Откако се на сила препораките за намалување на ризиците од високите температури дури 78 правни субјекти заработиле забрана за работа.

Адвокатот Валентин Пепељугоски вели дека фимите имаат потполно законско право да реагираат доколку добиле решение за вршење на дејноста.
– Ова е препорака од страна на Владата до приватниот сектор. Доколку забраната за вршење на работа е поради утврдено непочитување на препораките за топлотниот бран, тогаш фирмите можат истата да ја обжалат. Но ако имаат забрана за работа по друга основа тогаш работата е сосема поинаква- вели Пепељугоски.

Градежните фирми велат дека секоја година се повторува приказната. Трудовите инспектори се на терен, но забраната за работа е секогаш поради некоја друга неправилност која е пронајдена на градилиштата. Од Министерството за труд и социјална политика дека постапуваат по Законот за безбедност и здравје при работа и дека според тој закон имаат право со решение да ја забранат работата во целост.

– Со оглед на фактот дека одредени активности на правните субјекти може да претставуваат ризик по здравјето на изложените работници, Државниот инспекторат за труд покрај препораките, при инспекциските надзори постапува и во согласност со одредбите од Законот за безбедност и здравје при работа. Така согласно член 49 став 2 од Законот за безбедност и здравје при работа ако инспекторот на труд врз основа на надзор кај работодавачот утврди дека постои непосредна опасност по безбедноста и здравјето при работа на вработените, со решение ќе ја забрани работата во целост- велат во МТСП.

Според нив работодавачите од јавниот и приватниот сектор должни се да ги ослободат од работа бремените жени и лицата над 60 години возраст. Препораките за приватниот сектор се однесуваат само на начинот на организација на работното време со цел заштита од директна сончева изложеност на работниците и избегнување престој на отворено во период од 11 до 17 часот.

– Правните субјекти кој вршат градежна дејност и чии активности се вршат на отворено се должни да ги запрат активностите во период од 11 до 17 часот. Со оглед на фактот дека одредени активности на правните субјекти може да претставуваат ризик по здравјето на изложените работници, Државниот инспекторат за труд покрај препораките, при инспекциските надзори постапува и во согласност со одредбите од Законот за безбедност и здравје при работа. Така согласно член 49 став 2 од Законот за безбедност и здравје при работа ако инспекторот на труд врз основа на надзор кај работодавачот утврди дека постои непосредна опасност по безбедноста и здравјето при работа на вработените, со решение ќе ја забрани работата во целост- велат за Слободен печат од Министерството за труд и социјална политика.

Од таму објасуваат дека со оглед да во услови на топлотен бран климатските услови односно високите температури и високиот УВ индекс се максимум изразени, истите сами по себе претставуваат непосредна опасност по безбедноста и здравјето на работниците за што инспекторите на труд имаат правен основ за изрекување на напред наведената инспекциска мерка.
Цела работа започна на 13 јули кога Владата донесе препораки за намалување на ризиците од високите температури. Според нив треба ослободување од работни обврски на најранливите групи население, како што се: бремените жени и лица на возраст над 60 години;
Во установите за згрижување на децата (градинки), да не се практикува физичка активност и да не се изнесуваат децата на отворено во периодот од 11:00 до 17:00 часот;
Единиците на локалната самоуправа, Црвениот крст и Центрите за социјални работи, во регионите зафатени со топлотниот бран да пружаат помош на осамени, стари, изнемоштени лица и бездомници. Владата препорачува на приватниот сектор да го организира работното време со цел заштита од директна сончева изложеност на работниците, пред сѐ избегнување престој на отворено во периодот од 11:00 до 17:00 часот.