Поголеми купишта чакал и градежен шут, донесен од друга локација и истурен на поранешната депонија Вардариште врз новопоставените ценки на идниот колекторски систем за отпадни води, се причина што Инспекторатот на Град Скопје му изрече на сторителот казна од 88 илјади евра.

Се работи за градежната фирма „Бауер“, која во истовреме била ангажирана и како подизведувач на градежните работи на изградбата на истиот тој колекторскиот систем на Вардариште.

„Фатен е камион како истура поголемо количество на чакал и градежен отпад од друго место врз веќе затрупаните цевки на идниот колектор, иако тоа не е дозволено, а, дополнително, цевките можат и да се оштетат ако се изложат на сополнителна тежина“, велат од градскиот инспекторат за животна средина.

Додаваат и дека овој случај е плод на тоа што нивни инспектори секојдневно дежураат на некогашната депонија Вардариште. Ова е прва казна со повисок износ, изречена од инспекторите за животна средина во Скопје според новиот закон за управување со отпад, кој предвидува и дваесетина пати повисоки казни за прекршителите на законот од претходните законски решенија.

Некогашната депонија Вардариште со децении не се расчистува и не се ревитализира од страна на скопската локална самоуправа со образложение дека скапо чини. Во времето на претходникот на сегашната градоначалничка Данела Арсовска, Петре Шилегов, на Вардариште е депониран целиот градежен шут кој настанал од уривањето на скопското Сајмиште, а ридовите од бетонски блокови, шут и чакал денес се лоцирани во непосредна близина на трасата на идниот колекторски систем во Вардариште.