Финскиот претседателски кандидат Пека Хаависто вели дека неколку дена пред изборите во недела, неговата сексуалност била во фокусот на медиумите и ги обвинува новинарите на јавните телевизии дека учествуваат во нив.

65-годишниот поранешен министер за надворешни работи, кој би станал првиот лидер на земјата од Зелените и првиот геј претседател на Финска доколку победи, вели дека е изненаден од начинот на кој неговата сексуалност станала прашање на јавен интерес во вториот круг од изборите.

Меѓународната безбедност и одбрана се висок приоритет во земјата која се приклучи на НАТО минатата година поради Русија. Финскиот претседател е врховен командант на армијата и заедно со владата ја крои надворешната политика.

Кога Хаависто за прв пат се кандидираше за претседател во 2012 година, гласачите зборуваа за неговиот сексуален идентитет, но тој смета дека овој пат тоа не било толку истакната тема, барем не на почетокот.

Тој вели дека откако поминал во вториот круг, новинарите, особено оние од националната телевизија Јле, ја интензивирале дискусијата на таа тема.

Од неговиот дом во Хелсинки, каде што живее со својот партнер Антонио Флорес, тој рече: „Некои новинари во Јле, националниот радиодифузер, го покренуваат ова прашање на изненадувачки силен начин во вториот круг од гласањето. Мислам дека многу луѓе се изненадени од тоа. Ова е трет пат како се кандидирам на избори. Во првиот круг тоа не беше тема, па како тоа доаѓа во фокусот во вториот круг?“.

„Изненаден сум што тоа е проблем за време на вториот круг од овие избори“, рече тој, додавајќи дека гласачите за тоа зборуваат многу помалку отколку во 2012 година, кога тој првпат се кандидираше.

„Дури и тогаш тоа не беше толку големо прашање, па изгледа малку како вештачка тема сега во вториот круг“, рече тој и додаде дека некои новинари „биле толку активни на оваа тема што отвора некои прашања“.

Истражувањето на Универзитетот во Хелсинки покажа дека една третина од гласачите не би гласале за Хаависто бидејќи тој е геј. Последната анкета на Јле покажа дека Хаависто го достигнува Стуб, поранешен премиер и член на централно-десничарската владејачка партија, но сепак заостанува со 46-54%.

Друга тема за која разговараа Финците во последните денови беше нуклеарното оружје, при што Стуб и Хаависто не се согласуваат за потенцијалниот став на Финска. Хаависто е против нуклеарното оружје, што е во согласност со законот кој забранува нивно внесување во земјата. Од друга страна, Стуб вели дека законот треба да се промени.

Додека и двајцата кандидати имаат широка поддршка, онаа на Стуб е посилна кај пензионерите, а гласачите на Хависто се главно помлади.

„Тоа ќе биде тешка битка“, рече Хаависто.