Во сè повеќе земји, моделот „купи сега, плати подоцна“ е вообичаен, без оглед на тоа што се купува. Овој вид купување често е предмет на потсмев. За некои, практикувањето нешто вакво во ресторан, на пример, претставува најсмешен конзумеризам, додека за други претставува злоупотреба на луѓето. Сепак, овој став не е пречка за развојот на овој модел на купување.

Имено, според американската компанија за плаќања Ворлдпеј, минатата година низ целиот свет со БНПЛ биле потрошени 342 милијарди долари, додека 10 години претходно биле потрошени две милијарди долари. Финансиски компании со долга традиција, како што се ЈПМорган Чејс и ПејПал, влегоа на пазарот на БНПЛ, исто како што компаниите од секторот БНПЛ сè повеќе го прават она што го правеа традиционалните банки. Можностите за компаниите на пазарот на БНПЛ се можеби поголеми отколку за потрошувачите, пишува Економист, пренесува Кликс.ба. Идејата за давање кредит на местото на продажба е стара. Во 1856 година, претприемачите Исак Сингер и Едвард Кларк почнале да продаваат машини за шиење во делови со голем успех.

Современата индустрија работи на сличен начин. Кога некој ќе купи нешто за 100 долари, може да плати на рати, односно дел од него да го плати во моментот на купување, а остатокот на рати. Заемодавателот, како што се шведската компанија Kларна или американската компанија Aфирм, му го дава на продавачот целиот износ однапред за време на купувањето. Купувачот плаќа рати на заемодавателот во одреден временски период, обично за неколку недели, и не плаќа камата. Оние кои го овозможуваат БНПЛ генерираат приход врз основа на надоместоци што ги плаќаат трговците и/или клиентите.

Ова е добредојдено за трговците бидејќи на овој начин ја зголемуваат својата продажба. Покажано е дека оние кои го користат овој модел на плаќање трошат најмалку 20 проценти повеќе од оние кои не го користат. Продажбата е поголема во земјите каде што БНПЛ е достапен подолг временски период. На пример, една од пет онлајн продажби во Шведска се врши на овој начин, додека во Америка една од 16 онлајн продажби се врши преку овој модел на купување.