Долгометражниот игран филм „Домаќинство за почетници“, снимен по сценарио и во режија на Горан Столевски, а во продукција на „Лист продукција“, освои две награди „Златна арена“ на филмскиот фестивал во Пула, кој почна на 11 јули, а се затвора на 18 јули, со прикажување на победничките филмови.

„Домаќинство за почетници“ беше дел од натпреварувачката програма за малцински копродукции и освои „Златна арена“ за најдобра хрватска малцинска копродукција, а хрватскиот актер Владимир Тинтор доби „Златна арена“ за најдобра споредна машка улога за своето остварување во филмот.

Филмот е финансиски поддржан од Агенцијата за филм на Република Северна Македонија, а меѓу останатите финансиери е и Хрватскиот аудиовизуелен центар, чија поддршка е реализирана преку хрватскиот копродуцент „Кинорама“ од Загреб.

Златните арени се деветта и десетта награда за „Домаќинство за почетници“, кој до сега е прикажан на повеќе од 70 фестивали ширум светот, а е дистрибуиран во кината во Америка, Австралија, Холандија, Хрватска, Полска и во Македонија.

Светската премиера на „Домаќинство за почетници“ се одржа во 2023 година на филмскиот фестивал во Венеција, а македонската премиера беше на отворањето на Интернационалниот фестивал на филмската камера „Браќа Манаки“. Филмот беше избран за македонски кандидат за наградата „Оскар“ за најдобар долгометражен интернационален филм за 2023 година, а беше дел и од селекцијата за Европските филмски награди, каде доби една номинација.

Дистрибутер на филмот на територијата на САД е „Focus Features“, „Universal Pictures“ е интернационален дистрибутер за останатите територии, а продажните агенти на филмот „New Europe Film Sales“ од Полска го застапуваат филмот на територијата на југоисточна Европа.

Филмот „Домаќинство за почетници“ ќе може да се погледне на 19 и 20 јули во Кинотеката на РСМ, а проекциите ќе почнуваат во 20:30 часот.