Пред сто дена мандатот на новиот министер за правда Игор Филков почнал без официјално примопредавање од неговиот претходник Кренар Лога. Тој наследил празен кабинет без клучни оригинални документи како што е извештајот на Оценската мисија на Европската комисија за работата на Судскиот совет, но полн со чадори, чаши и торби набавени од Лога и неплатена фактура од речиси милион денари. Поради нефунционалното работење министерот Филков, како што кажа на денешната прес-конференција, од претходникот ќе бара одговорност.

– Го презедов министерството на многу невообичаен начин без приморедавање од мојот претходник и целосно испразен кабинет од потребна документација, но преполн со тукушто набавени чадори, маици, торби, чаши и други предмети, сите во количина од над 200 парчиња и се разбира неплатена фактура од 956.000 денари за добавувачот на истите. Затекнав сериозно испразнети финансиски ресурси, непостоење на евиденција за добивање на користење на мобилни телефони, лаптопи и електрични скутери од страна на мобилниот провајдер што укажува на персонификација на мојот претходник со институцијата Министерство за правда. Нефунционален возен парк и слободно можам да кажам девастирана функционалност на Министерството за правда – рече Филков.

Планираните реформи во правосудството, сузбивањето на корупцијата и враќањето на довербата на граѓаните во правосудните органи ќе биде тешко да се спроведат, бидејќи во  кабинетот на министерот го нема оригиналниот документ од Оценската мисија на ЕК заедно со препораките за реформа на Судскиот совет, а реформата бара упорност и храброст и поддршка од сите сектори од општеството, нагласи Филков.

– Голем предизвик во реализирањето на оваа активност претставува фактот дека Министерството за правда не располага со толку споменуваниот документ со препораките од Оценката мисија на Европската Комисија по однос на Судскиот совет. Иако документот е класифицирана документација, истиот е земен од мојот претходник, заради што министерството не располага со истиот. Како резултат на тоа принудени сме да се потпираме на електронски верзии, само на дел на документот кој ги содржи исклучиво препораките без соодветните образоложенија и официјалниот допис на ЕК – потенцираше Филков на отчетот по повод 100 дена од преземањето на министерската функција во Правда.

Во овој период констатирани се и низа злоупотреби во подрачните единици на Министерството за правда во Скопје, Централна и Источна Македонија. Затекнати се празни и со бројни необработени предмети за бесплатна правна помош и несоодветни услови за работа.

– Наспроти тоа подрачните одделенија на Министерството во одредени градови располагаат со по десетици вработени лица и минорен број на предмети за бесплатна правна помош. Ова укажува на крајната нерационалност при креирање на политиката за вработување во Министерството што сериозно го нарушува целиот концепт на бесплатна правна помош во земјата. Оваа состојба е констатирана и од Советот на Европа и се работи на надминување на проблемот со недостаток на лица за бесплатна правна помош – рече Филков.

Во наредниот период заложбите за целосно независно судството, ослободено од политичко влијание и одговорно пред граѓаните на кои им служи, со целосно искоренета корупција ќе се реализираат преку измени во постоечките законски решенија за Судскиот совет и Законот за јавно обвинителство кои ќе се најдат наскоро на јавна расправа, а се работи и на новиот закон за кривична постапка, на Граѓанскиот законик но и на Кривичниот законик кој во претходниот мандат имаше контроверзни измени кои доведоа до застарување на клучните постапки водени за злоупотреба на службена должност и овластување.

– Се работи на барање на соодветно решение за Кривичниот законик. Не е дискутабилно она што ние сакаме да го направиме и тука немам дилеми, но може да се разговара за тоа што Законот не дозволува да се примени ретрокативно, и тука го бараме најдоброто решение, за она што било сторено, како да се одговара за истото. Во периодот што следи и за ова ќе следат јавни дебати, но тоа нема да биде ноември бидејќи тогаш имаме премногу. Не брзаме во изнаоѓање на решнија за да се дојде до најдоброто-  рече Филков.

Министерството за правда работи во повеќе сфери: нотаријатот, извршителите, медијаторите, бесплатната правна помош, на нов закон за судска служба како важен дел од судскиот систем, а се бараат и солуции за нови вработувања во затворската полиција во која по пензионирањето може да влезат поранешни припадници на АРМ. За решавање на проблемот со хроничниот недостаток на судии и обвинители, Министерството предлага да се покачи границата за пензионирање на судиите и јавните обвинители на 67 години.