Марк Филипусис тврди дека, додека Рафаел Надал и Роџер Федерер демонстрирале неверојатен професионализам, Новак Ѓоковиќ го подигнал до степен каков што досега не е виден.

Двократниот грен-слем финалист го фали Ѓоковиќ за неговиот вреден пристап кон сите аспекти од тенисот и неговата желба да се подобри и да се избори за предност макар од „еден процент“, секогаш кога е можно.

Светскиот број еден освои три од четирите грен-слем турнири оваа година. Ѓоковиќ (36) освои рекордни 24 грен-слем титули, пред неговите големи ривали Надал и Федерер – кои се на 22 и 20 титули.

Филипусис ја препознава извонредната професионалност на секој член на „големата тројка“, но објасни зошто чувствува дека Ѓоковиќ се издвоил во овој поглед.

– Неверојатна професионалност се гледа кај Рафа или Федерер, но Ѓоковиќ го има подигнато нивото и тоа е едноставно неверојатно. Треба да јадете, да дишете и да спиете тенис за да освоите неколку грен-слемови. Тој не само што освои 24, што е луда бројка, туку сè уште продолжува да гледа каде може да се подобри. Каде може да го добие еден процент овде, еден процент таму – вели Филипусис, некогашен австралиски тенисер.

Австралиецот потоа објаснува прецизно што мислел.

– Тој внимава што внесува во телото, што прави пред мечот, начинот на кој се загрева, истегнувањето. Гледа на тој еден процент екстра насекаде, бидејќи тоа се брои на грен-слемовите…. Не сум видел таков професионалец. Има многу неверојатни професионалци, но никогаш не сум видел како Ѓоковиќ – вели Филипусис.