Уште на почетокот на мандатот ќе се залагам капитациониот бод за матичните лекари да се зголеми за 15 отсто, порача д-р Венко Филипче од трибината во Прилеп посветена на Светскиот ден на здравјето.

– Ние тоа еднаш го направивме и затоа и понатаму продолжуваме да го зајакнуваме примарното здравство – рече ексминистерот за здравство.

Примарната здравствена заштита е клучна за здрави поколенија, а матичните лекари заслужуваат нивната работа да биде признаена и вреднувана. Затоа, ќе ја зголемиме капитацијата, не во текот на мандатот, туку уште на самиот почетокот, нагласи тој.
Пред поголем број на здравствени работици присутни на трибината, д-р Филипче презентираше и други мерки, со фокус на примањата на здравствените работници и задржување на медицинскиот персонал во земјава преку подобрување на образованието, инфраструктурата и условите за работа во здравствените установи.

– Лекарите-специјалисти ќе бидат платени до 180.000 денари. Во општите болници, лекарите ќе примаат плата до 140.000 денари. Матичните лекари до 120.000 денари. Медицинските сестри, меѓу 60 и 90.000 денари – рече Филипче.

Покрај инвестирањето во здравствениот персонал, како што истакна Филипче, планирани се и инвестиции во здравствена инфраструктура и во медицинска опрема што дополнително ќе влијае позитивно на брзата дијагностика по современи стандарди и спасување на повеќе животи.