Министерот за здравство, Венко Филипче, денеска соопшти дека агрегатите на Клиничкиот центар во Скопје се во најдобар ред, откако вчера и завчера снема струја во неколку скопски клиники.

Универзитетската Клиника за гинекологија вчера соопшти дека бебињата во инкубатор не биле воопшто загрозени кога ЈЗУ ГАК останала без напојување со електрична енергија и нагласија дека секој витален апарат е поврзан на UPS, опција која е во функција додека не се вклучи агрегатот.

– Разговарав уште вчера со директорката на Клиниката и нема потреба од замена на агрегатотот, бидејќи го провериле и тој функционира одлично. Не била доведена во прашање безбедноста на новороденчињата. А осветлувањето во кругот на скопските клиники е подобрено уште претходно, кога беа заменети светилките – рече Филипче по доделувањето на Грантот од Јапонската влада во Деканатот на Медицинскиот факултет во Скопје.