Светската фудбалска федерација ФИФА планира да тестира ново правило кога е во прашање офсајд позицијата, а таа револуционерна идеја ќе биде тестирана на неколку натпревари во Холандија, Италија и Шведска, пренесуваат светските медиуми.

Според тие изјави, судиите добиле инструкции да досудат недозволена позиција само доколку напаѓачот со цело тело стои зад последната линија на одбраната на противничката екипа.

Не беше нагласено дали на споменатите натпревари судиите ќе имаат помош од ВАР технологијата или ќе се потпрат само на нивната проценка, но идејата е да им се даде предност на напаѓачите, односно навивачите да имаат можност да видат што е можно повеќе голови во еден натпревар.

Доколку ова правило се покаже добро, ФИФА планира да го спроведе и во некои други лиги ширум светот, а потоа и во своите официјални натпреварувања.

За потсетување, до сега правилото за офсајд гласеше дека играчот на напаѓачката екипа, во моментот кога топката ќе му биде додадена, мора да биде во линија или зад најмалку двајца противнички играчи, од кои едниот најчесто е противничкиот голман, но не е неопходно тоа да биде чуварот на мрежата.