Словачката гасна компанија СПП почна да увезува руски гас преку гасоводот Турски тек на 1 февруари, а испораките се очекува да се удвојат од април, изјави во четвртокот претседателот на компанијата Војтех Ференц, објавија локалните медиуми.

Увозот на руски гас во Словачка преку цевководи од советската ера кои поминуваат низ Украина запре на 1 јануари, откако Киев одби да го обнови транзитниот договор со Москва.

Компанијата не планира да го раскине договорот со руската групација „Газпром“, кој трае до 2034 година, изјави Ференц за информативната веб-страница „Денник Н“.

Словачкиот премиер Роберт Фицо минатиот месец жестоко ги нападна украинските власти и претседателот Володимир Зеленски, обвинувајќи ги дека ја загрозуваат енергетската стабилност на неговата земја. Фицо потоа изјави дека рускиот претседател Владимир Путин ѝ ветил на Словачка дека „Гаспром“ ќе најде алтернативни начини за испорака на договорениот гас.

Гасоводот Турски тек минува 930 километри под Црното Море од рускиот туристички град Анапа до Кијикој во северозападна Турција. Потоа се поврзува со надземни цевководи кои ги снабдуваат Унгарија и Словачка преку Балканот.