Израелски дрон „Херон“ бил виден денеска како лета над хуманитарниот брод „Хандал“, кој плови кон Газа, што предизвика стравувања од можно пресретнување од страна на израелските сили, соопштија организаторите на оваа хуманитарна иницијатива, пренесува Анадолу.

Коалицијата „Флотила на слободата“ соопшти дека дронот активно кружел околу бродот, кој бил на околу 90 наутички милји од Газа.

– Мораме да побараме итна акција за Газа. Притиснете ги вашите влади да престанат да овозможуваат геноцид и да дозволат Хандала да продолжи безбедно – се вели во соопштението објавено на социјалните медиуми од групата.

Појавувањето на дронот доаѓа во време на растечко меѓународно внимание кон патувањето на бродот. Во петокот, коалицијата објави дека 16 дронови прелетале над Хандала во рок од 45 минути, некои директно над бродот.

Американска активистка изјави дека екипажот ќе штрајкува со глад доколку израелските сили нападнат или ги спречат да стигнат до Газа.

Бродот „Хандала“, кој исплови од Италија, транспортира бебешка формула, храна и лекови во согласност со меѓународното поморско и хуманитарно право.

Превезува 21 невооружен цивил, вклучувајќи пратеници, медицински лица и волонтери, на мисија да ја пробијат израелската блокада на Газа.

Во последните месеци, Израел пресретна повеќе бродови за помош кои се упатија кон Газа во меѓународни води. Во јуни, израелските сили го зазедоа „Мадлин“, приведувајќи 12 меѓународни активисти, вклучувајќи ја шведската активистка Грета Тунберг и француската европратеничка Рима Хасан.

Израелските одбранбени сили (ИДФ) пак објавија соопштение во кое се вели дека Израел вечерва ќе достави помош за Газа преку воздух.

Израелските сили соопштија дека ќе бидат воспоставени хуманитарни коридори за конвои на Обединетите нации, иако не кажаа кога или каде.

Ажурирањето доаѓа по зголемените извештаи за смртни случаи поврзани со глад во Газа. Во соопштението се додава дека армијата „нагласува дека борбените операции не престанале“ во Газа против Хамас и го повторува ставот на израелската влада дека „нема глад“ на таа територија.

– Помошта вклучува седум палети брашно, шеќер и конзервирана храна што ќе бидат обезбедени од меѓународни организации – додаде армијата во соопштението.