Фудбалската федерација на Русија ги осуди мерките кои ги воведоа ФИФА и УЕФА со суспензијата на сите руските репрезентации и клубови од меѓународните натпреварувања.

Федерацијата реагираше со соопштение во кое вели дека „апсолутно не се согласува со одлуката на ФИФА и УЕФА да ги суспендираат руските екипи од сите меѓународни натпревари на неопределено време.“ Исто така Федерацијата нагласи дека може „правдата“ да бара и во Судот за спортска арбитража.

„Оваа мерка има јасен дискриминаторски ефект на голем број спортисти, тренери, врабогите во клубовите или репрезентацијата и што е најважно на милиони руски и странски навивачи. Имаме право овие одлуки да ги преиспитаме пред Судот за спортска арбитража и да побараме од судот да каже дали одлуките на УЕФА и ФИФА се во согласност со меѓународното спортско право“, стои во соопштението на Фудбалската федерација на Русија.

Денеска прво УЕФА објави дека го суспендира Спартак Москва од Лигата на Европа поради руската воена агресија врз Украина, а потоа европската куќа на фудбалот го раскина спонзорскиот договор со нафтениот гигант Газпром.

Потоа следеше апелот на Меународниот олимписки комитет (ИОК) до спортските федерации да се суспендираат Русија и Белорусија од сите меѓународни натпреварувања. ФИФА и УЕФА го послушаа советот и ја суспендираа Русија, односно нејзината репрезентација и клубови од сите меѓународни натпреварувања.