Возачот на Астон Мартин, Фернандо Алонсо (43), смета дека претстојната сезона која започнува на 16 март со трката за ГН на Австралија ќе биде изедначена и возбудлива.

Двократниот шампион во Ф1 се надева дека сезонава ќе биде повозбудлива од ланската.

– Се надеваме дека ќе има повеќе победници и ќе биде тесно првенство. Минатата година веќе беше многу добро и се надевам дека оваа година ќе биде уште подобро – вели Шпанецот.

Четири тима, Ред Бул, Ферари, Мекларен и Мерцедес, победуваа на трки во 2024 година, што е голема промена од 2023 година, каде што само на една трка не победи Ред Бул.

Алонсо верува дека Астон Мартин направил „чекор напред“ со својот нов автомобил во споредба со неговиот претходник од 2024 година, но ќе се види подобро каде стои тимот кога ќе започне сезоната во Австралија.