Фудбалскиот клуб Барселона сака да го засили нападот во летниот преоден рок, но Феран Торес не го гледа тоа како знак дека треба да си замине.

Шпанецот за тамошните медиуми изјави дека секоја квалитетна конкуренција е добредојдена, бидејќи во Барселона треба да играат само најдобрите.

– Клубот сака да доведе нов напаѓач кој ќе го поддржи Роберт Левандовски? Немам ништо против конкуренцијата, напротив, подготвен сум да се борам и да докажам дека заслужувам да играм. Дали верувам дека во иднина можам да бидам првиот напаѓач на Барселона? Апсолутно – изјави Феран Торес.

Феран Торес оваа сезона одигра 31 натпревар, но најмногу доаѓаше од клупата за резерви, а тоа го потврдува и податокот дека на теренот мина 1,104 минути или нешто повеќе од половина час по натпревар.

Тој постигна 11 гола и запиша три асистенции, што е повеќе од солиден учинок за таква минутажа.

Што се однесува до желбите на Барса, Нико Вилијамс некако падна во втор план, Барса се сврте кон Александар Исак и Луис Дијаз кои секако се тешки и скапи мети.