ФДА со добри вести: Одобрена е првата таблета за третман на алопеција
По 36 недели тестирање на лекот, речиси 40 отсто од оние што земале поголема доза од лекот, им се вратиле дури 80 отсто од влакната на главата.
Во иднина, за лекување тешки облици на алопеција ќе се користи првата орална таблета одобрена од Американската агенција за храна и лекови (ФДА). ФДА го одобри лекот наречен барицитиниб како прва орална таблета за лекување алопеција, автоимуно нарушување што погодува околу 300.000 луѓе секоја година само во САД.
Препорачано
Барицитиниб ќе се користи за лекување тешки облици на алопеција
Алопеција предизвикува привремено или трајно нерамномерно опаѓање на косата, што може да влијае на која било влакнеста област на телото, што дополнително води до емоционален стрес. Оваа ситуација неодамна се најде во центарот на вниманието на годинашните Оскари, поради случајот со холивудската актерка Џејд Пинкет Смит. Лекот барицитиниб е произведен од американската фармацевтска компанија „Ели Лили“ и ќе се продава под трговското име олумиант (Olumiant) и припаѓа на класата лекови наречени инхибитори на Јанус киназа. Делува така што го нарушува клеточниот пат што води до воспаление.
Со поголеми дози од лекот, на пациентите им се вратила 80 отсто од изгубената коса
Одобрувањето на таблетите барицитиниб против алопеција се заснова на резултатите од две клинички испитувања, кои опфатиле вкупно 1.200 возрасни лица со тешка алопеција. Секоја студија ги поделила учесниците во три групи – плацебо група, група која примала доза од 2 милиграми на ден и група која примала доза од 4 милиграми секој ден. По 36 недели, на речиси 40 отсто од оние кои земале поголема им се обновиле 80 отсто од влакната на главата, во споредба со околу 23 отсто во групата со помала доза и 5 отсто во групата со плацебо. Околу 45 проценти од луѓето во групата со поголеми дози забележале значителен раст на веѓите и на трепките.
Пријавени несакани ефекти
Најчестите несакани ефекти вклучуваат инфекции на горниот респираторен тракт, главоболки, акни, висок холестерол и зголемување на ензимот наречен креатин фосфокиназа. Претходните третмани за алопеција вклучуваат локални или орални лекови, но тие се сметаат за експериментални и ниту еден не е официјално одобрен. Барицитиниб претходно беше одобрен за третман на ревматоиден артритис, а за време на пандемијата на ковид-19, неговата лиценца беше проширена и за лекување на хоспитализирани пациенти со ковид-19.
