Фармацевтските компании AстраЗенека, Бајер и Берингер Ингелхајм, заедно со мексиканската Карнот, објавија инвестиција од 600 милиони долари (516 милиони евра) во Мексико, објави Франс Прес. Фармацевтскиот сектор е „апсолутен приоритет за претседателката Клаудија Шајнбаум, особено поради неговото глобално влијание“ и за здравјето на Мексиканците, изјави министерот за економија Марсело Ебрард Касаубон, кој ја објави инвестицијата заедно со регионалните претставници на компаниите.

Четирите фармацевтски компании имаат за цел да „ги прошират своите технолошки и производствени капацитети, како и своите извозни капацитети“, изјави мексиканскиот министер за здравство Давид Кершенобиќ. Германскиот фармацевтски гигант „Баер“ планира да инвестира приближно 160 милиони долари во следните пет години, изјави директорот на компанијата за Мексико, Мануел Браво. „Берингер Ингелхајм“ ќе инвестира 187 милиони долари во текот на неколку години за да го трансформира својот погон за производство на фармацевтски таблети во градот Шочимилко, јужно од главниот град, во „најголем во светот“, изјави Аугусто Минх, извршен директор на компанијата за Мексико, Централна Америка и Карибите.

Британската фармацевтска компанија „АстраЗенека“ ќе го прошири својот центар за иновации и производствени капацитети за лекови за дијабетес тип 2 и хронична бубрежна болест во Мексико. Со инвестиција од 120,7 милиони долари до 2026 година, британската компанија ќе ги прошири и своите клинички истражувачки активности, објасни претставникот на земјата, Хулио Ордаз, пренесува БТА.