Факултетот за музичка уметност ќе го промовира новото пијано со настап на Симон Трпчески во Националната опера и балет
Во големата сала на НУ Национална опера и балет на 26 февруари, со почеток во 19 часот, ќе се одржи концертна промоција на пијаното Feurich, донација за Факултетот за музичка уметност – Скопје од Кочо Анѓушев, во соработка со Австриската амбасада и Н.Е. Мартин Памер, со сесрдна поддршка на Националната опера и балет и директорот Оливер Арсовски, како и „Пијано центар“.
Препорачано
Ексклузивен гостин на вечерта ќе биде амбасадорот и промотор на македонската култура – Симон Трпчески, кој е алумни на ФМУ – Скопје, а ќе настапи со реномирани уметници и професори од ФМУ – Скопје.
Факултетот за музичка уметност е јадро на музичката едукација во земјата со најдолга историја, која кадровски ги екипира најзначајните институции, кои се столбови на македонската музичка култура, како Македонската опера и балет, Македонската филхармонија, Националниот џез-оркестар, Битолскиот камерен оркестар, како и наставниот кадар за стручното и општо образование на сите нивоа во Републиката.
– Препознавањето на значењето на ФМУ – Скопје и поддршката се пресудни за понатамошниот квалитативен подем на музичката и балетската сцена како стожери на културниот развој во Македонија. Претстои прекрасен концерт, кој ќе биде пример за тоа како треба и може да делуваме заедно за подобра иднина – истакнуваат од Факултетот за музичка уметност при УКИМ – Скопје.
