Фајненшл тајмс: Бугарите обвинети за шпионажа во корист на Русија, планирале напади на украински војници
Бугарите, обвинети за шпионажа во корист на Русија, планирале да нападнат украински војници, пишува „Фајненшл тајмс“, повикувајќи се на извори од судот во Лондон, каде во моментов е во тек случајот против бугарските државјани.
Препорачано
Според изданието, нивна цел биле украински војници кои биле обучени да работат со софистицирани системи за противвоздушна одбрана во американска база. Дел од Бугарите го планирале нападот на воен објект во сопственост на САД, кој се наоѓа во близина на германскиот град Штутгарт, во периодот од октомври 2022 година до нивното задржување во февруари следната година.
Обвинението е во рамките на судскиот процес против тројца бугарски државјани кои живеат во Велика Британија – Катрин Иванова, Вања Габерова и Тихомир Иванчев, кои се обвинети за заговор за шпионажа.
Обвинителството тврди дека тие дејствувале под раководство на Јан Марсалек, австриски државјанин за кој се верува дека има врски со руското разузнавање. Според Марсалек, украинските војници биле обучени да управуваат со системите „Патриот“.
Водачот на групата Орлин Русев добивал наредби од Австриецот Јан Марсалек, кој бил во контакт со Русите. Двајцата разговарале за тоа како да користат уреди за пресретнување и следење на мобилните податоци од воениот персонал кој бил во американската база. Се дозна дека другите двајца обвинети, Катрин Иванова и Бисер Џамбазов, ги снимиле безбедносните објекти на базата, како огради, камери и инфрацрвени сензори.
На поротниците им биле покажани пораки на Телеграм во кои Марсалек го предупредува Русев да биде внимателен „затоа што Германците во моментов се нервозни поради активностите на руското разузнавање на теренот“.
На поротниците им беше кажано и за претходна операција за следење на рускиот државјанин Кирил Качур, кој подоцна беше назначен од Москва како „странски агент“. Додека биле на мисија да го надгледуваат Качур околу градот Будва во Црна Гора во јануари и февруари 2022 година, и Иванчев и Иванова сретнале жена за која се верува дека е руски шпион со кодно име „Црвено врапче“, стана јасно на суд.
