Европското обвинителство, предводено од обвинителката Лаура Ковеси, објави дека истрагата за можна злоупотреба на пари од фондовите на Европската унија за реконструкција на железничката станица во Нови Сад е сè уште во тек, но дека деталите не можат да бидат објавени за да не се загрози исходот од истрагата, пренесува Н1 телевизија.

„Поради многу висок јавен интерес, Европското обвинителство пред неколку месеци потврди дека е во тек истрага за можна злоупотреба на средства од ЕУ во врска со железничката станица во Нови Сад. Европското јавно обвинителство мора да одлучи за вршењето на својата надлежност кога е извршена измама во врска со средствата од ЕУ доделени на земји кои не се членки на ЕУ или земји-членки кои не учествуваат во ЕУ. Со оглед на тоа што штетата врз финансиските интереси на Унијата е составен дел од кривичното дело измама, кога таквата штета се случува во Белгија или Луксембург (бидејќи средствата се исплаќаат оттаму, каде што се наоѓаат институциите на ЕУ), постои надлежност на тие земји-членки и затоа надлежност на Европското јавно обвинителство, без оглед каде се случило дејствието, т.е. на територијата на трета земја“, соопшти Европското обвинителство.

На 15 март оваа година, Европското јавно обвинителство започна истрага за можна злоупотреба на пари од средствата од фондовите на ЕУ за реконструкција на железничката станица во Нови Сад.

Во уривањето на реконструираната настрешница на 1 ноември минатата година загинаа 16 лица.

Ниту девет месеци по трагедијата, ниту еден од службениците кои учествуваа во реконструкцијата на Железничката станица не е обвинет.