Европската демократска партија денеска посочи дека српското раководство, почнувајќи од претседателот Александар Вучиќ, продолжува да ја избегнува одговорноста за падот на настрешницата во Нови Сад и ги повика европските лидери да застанат на страната на граѓаните кои бараат вистина, безбедност и одговорност, пренесува Н1 телевизија.

На денот кога се навршуваат девет месеци од уривањето на настрешницата на железничката станица, европските демократи велат дека граѓаните и студентите продолжуваат да бараат правда за жртвите и крај на корупцијата и неказнивоста што доведоа до смртта на 16 лица.

„Граѓаните и студентите ги исполнија улиците барајќи правда – за жртвите и против корупцијата и неказнивоста што ја овозможија оваа катастрофа. Сепак, политичкото раководство, почнувајќи од претседателот Вучиќ, продолжува да избегнува одговорност“, соопшти проевропската центристичка партија на X.

Партијата, чии европратеници во Европскиот парламент припаѓаат на либералната група „Обнови ја Европа“, истакна дека одложувањето на правдата негативно влијае на демократијата.

„Кога правдата се одложува, демократијата е поништена. Европа мора да застане на страната на оние кои бараат вистина, безбедност и одговорност“, додаде партијата, чиј претседател е францускиот премиер Франсоа Бајру.