Македонскиот женски ракометен клуб Ѓорче Петров продолжува да реди победи сезонава во Европскиот куп. Ракометарите предводени од тренерот Симе Симовски во саботата во првиот натпревар од осминафиналето во салата „Автокоманда“ во Скопје триумфираа против чешкиот Кинжварт (32:29).

Во текот на првото полувреме водеше гостинската екипа одржувајќи позитива од два-три голови разлика, а на паузата имаше минимално водство од 14:13.

На стартот од вториот дел ѓорчепетровки успеаја два пати да израмнат на 15:15 и 16:16, а при негатива од 20:22 следуваше серија на домаќинот од 4:0 за преземање на водството.

До крајот на мечот ЖРК Ѓорче Петров не ја испушти позитивата, во еден момент дојде и до највисоки „плус пет“ (32:27), но во финишот со два гола ривалот го ублажи поразот за одржување на своите шанси во овој двомеч.

Во победничките редови по шест голови имаа Коларовска, Јанкуловска и Ризоска, а четири запиша Божиновска. Дали оваа предност ќе биде доволна за пласман во четвртфиналето ќе дознаеме на реваншот кој е закажан за 20 јануари во Чешка со почеток од 18.00 часот.