Владејачката коалиција во Германија, Социјалдемократската партија на Германија (СПД), Зелените и Либерално-демократската партија (ФДП) се губитници на изборите за Европскиот парламент во Германија, додека екстремно десничарската Алтернатива за Германија (АфД) стана втора партија по број на гласови, а на истокот на Германија најсилна политичка сила, објави хрватската агенција Хина.

– Успехот на АФД е историски настан. Ние сме најсилната сила на истокот на Германија. Не би можеле да посакаме посилен ветер на грб, изјави вечерва потпретседателот на АФД, Тимо Крупала, по објавувањето на нецелосните резултати од изборите за Европскиот парламент.

Излезните анкети покажуваат дека победник на европските избори е Христијанско-демократската унија ЦДУ/ЦСУ со 30 отсто од гласовите, а по неа е АФД со 16 отсто. Од друга страна, АФД освои 27 отсто од гласовите во сојузните покраини од некогашната Источна Германија и таму стана најсилна политичка сила.

Владејачката партија СПД на канцеларот Олаф Шолц со освоени 14 отсто гласови постигна резултат понизок од очекуваниот.

Зелените со 12 отсто се најголеми губитници во однос на изборите пред пет години кога освоија 20 отсто. Исто така, владејачката ФДП освои пет отсто од гласовите.

И покрај падот на популарноста поради бројните скандали со нејзините политичари, АФД успеа, според првичните анализи, да профитира од незадоволството на граѓаните од работата на коалициската влада.

Првите анализи покажаа дека АФД била особено успешна кај помладите гласачи. Во групата од 16 до 24 години таа партија освоила 17 отсто од гласовите, додека владејачката СПД и Зелените поминаа лошо во оваа старосна група, со поддршка меѓу 9 и 11 отсто.