Еден од најдобрите италијански репрезентативци на Европското првенство, Леонардо Спинацола, кој ја повреди Ахиловата тетива во четвртфиналето против Белгија, објави дека в недела ќе биде на стадионот „Вембли“ во Лондон за да навива за своите соиграчи во финалето против Англија.

– Ќе бидам на трибините на Вембли со патерици и ќе навивам за моите репрезентативни колеги. Свесен сум дека ќе биде тежок натпревар, но навивањето на англиските навивачи само ќе нè мотивира нас уште повеќе. Доколку ја освоиме титулата, ќе бидам на теренот заедно да славиме.

Мојата сопруга постојано ми вели да внимавам, доколку бидеме шампиони, ако треба ќе скокам и на едната нога. Оваа репрезентација е одлична, сите се чувствуваме како да сме едно големо семејство – изјави Спинацола за италијанските медиуми.

Членот на Рома веќе беше опериран во Финска и ќе биде надвор од терените седум до осум месеци.

Спинацола блескаше на ЕП на позицијата лев бек, честопати се приклучуваше на нападот, запиша две асистенции, и од УЕФА двапати беше прогласен за најдобар играч на натпреварот.

ВИДЕО: Италијанците во еден глас пеат во чест на Спинацола

ФОТО: Англичаните се срамат од своите навивачи, со ласер го попречуваа Шмајхел