Компанијата „ЕВН хоум“ испрати појаснување до јавноста откако утрово ја исклучила струјата до заедничкото броило во кулата Б од комплексот „Џевахир“ , а на тоа реагираше и Центарот за управување со кризи, односно неговиот директор, Стојанче Ангелов.

Од компанијата велат дека струјата била исклучена откако претходно испратиле опомена пред исклучување.

„ЕВН хоум“ секогаш го користи исклучувањето на корисниците само како крајна мерка. Во врска со исклучувањето на заедничката потрошувачка во кулата Б од Џевахир, до сопственикот на броилото навремено било испратено опомена пред исклучување. Законска обрска на управителите на зградите, а особено на такви висококатници, е да имаат обезбедено агрегат за лифтовите, бидејќи прекини во снабдувањето може да настанат од повеќе причини. ЕВН жали за настанатата ситуација, но компанијата е надлежна само во делот на мрежата до броилото. „ЕВН“ не e во позиција да се вмеша во внатрешното менаџирање на висококатниците“, соопшти компанијата.

Центарот за управување со кризи денеска соопшти дека во една од кулите во комплексот „Џевахир“, која останала без електрична енергија, имало бремена жена во лифтот и повика вакво нешто да не се повтори.

– Денес околу 9.45 часот снемало струја во кулата Б во високите 40-катници во Џевахир. Стапено е во контакт со ЕВН од каде што одговориле дека поради технички проблеми дошло до прекин на електричната енергија. Подоцна ЦУК бил известен од ЕВН дека исклучувањњето се случило поради неплатени сметки. Имаме непотврдена информација дека во една од кулите имало бремена жена, односно во лифтот во кој што снемало струја. Апелираме и до ЕВН и до управителите да се надмине оваа ситуација. Не треба да чекаме некој да настрада и некој да биде умрен за да навремено се реагира. Го повикуваме управителот на кулата кој е должен да има агрегати за напојување – рече Стојанче Ангелов, директор на ЦУК.

Ангелов: Да не се исклучува струја во кулите на Џевахир, некој може да биде повреден