На едно коло пред крајот на првата фаза, Еурофарм Пелистер ги загуби шансите за пласман во плеј-офот од Лигата на шампионите.

По вчерашната победа на Висла Плоцк и поразот на битолскиот состав од Фуксе со 29:39 македонскиот претставник повеќе нема шанси да дојде до најдобрите 12 екипи кои обезбедуваат место во следната фаза. На Еурофарм Пелистер не би му помогнала ниту победа над ПСЖ во последно коло.

Фуксе во вечерашниот натпревар имаше одличен старт и по десет минути водеше со 7:1, но македонскиот претставник успеа резултатски да се врати во игра и до крајот на првиот дел намали на 15:12.

Сепак за нешто повеќе Пелистер немаше сили во вториот дел, па набрзо предноста на домаќините почна да расте, а на крајот славеа победа од десет гола разлика.

Најефикасен кај Пелистер беше Филип Кузмановски со седум гола, шест постигна Мамдух, а по четири имаа Борзаш и Павле Атанасијевиќ. За Фуксе Берлин по девет постигнаа Лангхоф и Гидсел.