Во претходните два дена Еурофарм Пелистер го напуштија данските ракометари Каспер Кисум и Андреас Јохан Нилсен, а денес битолскиот клуб потврди дека ја раскинува соработката и со Дарко Стевановиќ.

Стевановиќ во клубот дојде пред десет месеци од редовите на Мешков Брест.

Шампионот на Македонија, Еурофарм Пелистер ја известува јавноста и своите приврзаници дека спогодбено го раскина договорот со српскиот интернационалец Дарко Стевановиќ. Десет месеци по неговото доаѓа во нашиот клуб од Мешков Брест, левиот бек ќе тргне по нов предизвик, за што му посакуваме успеси и многу среќа.

26-годишниот Стевановиќ со Еурофарм Пелистер го освои шампионатот на Македонија во сезоната 2022/23, а настапуваше и во СЕХА лигата, домашниот шампионат, национален Куп и Суперкуп.

Очигледно актуелниот шампион во вториот дел од сезоната ќе влезе со многу промени во ростерот.