Денеска и во својот шести натпревар сезонава во ракометната Лига на шампионите екипата на Еурофарм Пелистер претрпе пораз овојпат пред своите навивачи во салата „Боро Чурлевски“ во Битола од Кјелце со 21:24.

Во текот на првото полувреме гостите го контролираа резултатот, стекнаа висока предност од „плус седум“ (2:9). Негативата на битолската екипа се движеше од шест-седум голови разлика, а на пауза Полјаците имаа позитива од 8:14.

Во вториот дел многу подобри перформанси имаа играчите на Еурофарм Пелистер, направија серија од 7:2 и на семафорот стоеше само 15:16 за Кјелце.

На моменти Кјелце повторно ќе избегаше на два-три голови разлика, но повторно ќе се враќаше домашниот тим на „минус еден“, но никако и да направи целосен пресврт.

Се доближуваше тимот на Ангеловски до 18:19, 20:21, 21:22, во завршните минути пресудија и неколку исклучувања кај домаќините што го искористи Кјелце за одржување на позитивата до самиот крај на средбата и освојување на бодовите.

За Еурофарм Пелистер со шест голови се истакна Радивојевиќ, четири имаше Пешевски, а три Борзаш. За Кјелце најрасположен беше Олејнишак со пет голови, а по четири запишаа Морито и Тастарсон.

Играчите на Бранислав Ангеловски остануваат на последната осма позиција во групата „А“ без бодови. Во следното коло актуелниот македонски шампион по ЕХФ неделата ќе гостува во Унгарија кај Пик Сегед на 16 ноември.