Еурофарм Пелистер го најави гостувањето во Париз, македонскиот шампион го чека тежок испит против ПСЖ
Македонскиот шампион, Еурофарм Пелистер го најави натпреварот против големиот Пари Сен Жермен во рамките од четвртото коло од Лигата на шампионите.
Препорачано
Тренерот на тимот, Александар Јовиќ порача дека овој натпревар ќе биде одлична можност за промоција на Еурофарм Пелистер и Битола.
„Играме против екстра-квалитетна екипа, нè чека тежок натпревар и одлична можност за промоција за клубот и градот. Ќе направиме сè да се прикажеме во најдобро светло. Играме против екипа која редовно игра на „фајнал-фор“ на Лигата на шампионите. ПСЖ преферира брза игра, имаат одлична транзиција, но ние ќе се обидеме да наметнеме наша игра. Како што игравме и против Кил, ќе пробаме да ги сведеме на што е можно помалку голови. Нè радува што евидентно растеме и ова е одлична можност тоа да го потврдиме. Тренираме во полн состав, Тајник се враќа во тимот и мотивирани сме за дуелот в четврток“, изјави Јовиќ.
Изјава за новинарите даде и еден од ракометарите во најдобра форма во битолскиот состав, Марио Танкоски. Танкоски одлично ја користи дадената шанса и од натпревар во натпревар добива се поголема минутажа.
„Многу ни значи тоа што одигравме одличен натпревар против Кил. Влијае тој натпревар на самодовербата, иако не победивме, а имавме можност за тоа. Се подигнавме психички, па тоа ни е добредојдено за следните предизвици.
ПСЖ е најсериозен испит сезонава. Заедно со Киелце, сметам дека нашиот следен противник е најсилната екипа во групата, па и во Европа. Го имаат најдобриот тренер во светот – Раул Гонзалез. Променет им е составот од минатата сезона, им треба време да се воиграат, но имаат екстра-квалитет. Сепак, се екипа од дваесет милиони евра, тука е голема разликата со нас. Треба да одиграме најдобро што можеме, па што биде, нека биде.
Октоври и ноември се најтешки месеци во сезоната, но веќе сме во тој ритам и само да сме здрави и да не избегнат повредите, ќе ги исполниме целите“, изјави Танкоски.
Еурофарм Пелистер по три натпревари во елитата е без бодови со три порази, додека ПСЖ има две победи и еден пораз. Натпреварот се игра в четврток од 20:45 часот.
