Европската унија (ЕУ) денес објави дека постигнала принципиелен договор со Украина за слободна трговија, особено за чувствителниот аспект на увозот на земјоделски производи.

Тоа е „избалансиран, фер и реалистичен“ договор, изјави европскиот комесар за трговија Марош Шефчович, истакнувајќи ги квотите за „чувствителни производи како што се јајца, шеќер и пченица“.

За да го поддржи Киев во услови на руска инвазија, ЕУ воведе царинско ослободување за украинските земјоделски производи од 2022 година до 5 јуни оваа година.

Но, европските земјоделци редовно ја осудуваат „нелојалната конкуренција“ од Украина, земјоделски гигант, и повикуваат на враќање на квотите што беа во сила пред војната, како што е утврдено во договорот од 2016 година.

Брисел верува дека постигнал рамнотежа, благодарение на компромисот постигнат со Киев за време на викендот, пренесува Н1.

„Со новиот договор, обезбедуваме трговски текови од Украина до Европа. Во исто време, продолжуваме да ги заштитуваме интересите на нашите земјоделци“, рече претседателката на Европската комисија, Урсула фон дер Лајен.

За да ја увери индустријата, ЕУ ветува квоти за производи како што се пченица, пченка, шеќер, мед, живина и јајца.

Овие квоти ќе бидат повисоки од оние во 2016 година, но пониски од рекордниот увоз од Украина во последните три години, рече комесарот на ЕУ за земјоделство, Кристоф Хансен, додавајќи дека другите производи, како што се сокот од грозје и ферментираното млеко, ќе бидат целосно либерализирани.