Компанијата „Топлина“ од охридското село Подмоље ќе копа јаглен и меѓуслојна јаловина од рудникот Брод-Гнеотино за потребите на РЕК Битола. Така „во четири очи“, со преговарање без да се објави оглас, решило раководството на државната компанија Електрани на Северна Македонија (ЕСМ), објави „360 степени“.

Според денешната објава на Бирото за јавни набавки, станува збор за рамковна спогодба, што значи дека може, но не мора да се исцрпи целата сума од вкупната вредност на договорот, која изнесува околу еден милион и 150 илјади евра.

Спогодбата е склучена на шест месеци, а ваквите договори вообичаено се склучуваат на една до две години. Вкупната сума е далеку помала од последниот договор што го склучи претходното раководство на ЕСМ, вреден 46 милиони евра.

Носител на тој договор, жестоко критикуван од ВМРО-ДПМНЕ во опозициските денови на партијата, беше фирмата „Марковски компани“. Минатиот месец, РЕК Битола еднострано го раскина договорот со „Марковски компани“, образложувајќи го потегот со „неодговорно постапување“ на економскиот оператор, кој не ги исполнувал обврските и со тоа „директно ја загрозил енергетската стабилност на државата“.