Есенската кошница ќе заврши, а некои трговци немаат абер да ги сменат цените, може да се прочита меѓу редовите од Извештајот по најновите контроли на пазарните инспектори. Во него, меѓудругото се констатира дека цените на основните прехранбени производи, односно на производите опфатени со владината Одлука, се намалени кај повеќето трговци, но затекнати се и трговци кои во моментот на надзорот вршеле нивелација на цените, додека други не ги намалиле цените и не ставиле ознаки пропишани во Одлуката! Издадени се 30 прекршочни платни налози во вредност од над 4 милиони денари, а казнети се големи и средни трговци, односно маркети во Скопје (Aрaчиново и Чаир), Битола, Струмица, Валандово, Охрид, Куманово, Гостивар, Струга…

-На територија на целата земја извршени се над 500 вонредни инспекциски надзори врз основа на Одлуката на Влада за посебни услови на трговија на одделни стоки (Службен весник на РСМ бр. 196/24), која се однесува на маржа од 10 отсто кај производите наведени во Одлуката и за трговците на мало и за трговците на големо. Дел од правните субјекти се задолжени со доставување на дополнителна документација до пазарниот инспекторат врз основа на која би се утврдила фактичката состојба во целост и затворање на постапката – објави Државниот пазарен инспекторат. Надзорите се спроведувани со ротирање на тимови од различни одделенија во сите градови во Северна Македонија.

Една од најчестите главоболки на граѓаните кои одат во маркетите е неможноста да ја разликуваат цената на производот на полицата од цената што треба да се плати на касата, или дека има неколку различни цени што можат да бидат само „дешифрирани. Тоа се случува и во моментот кога е при крај мерката „помалку трошоци, повеќе за тебе“. Некои граѓани дефинитивно ја плаќаат цената на што и да е, некои го враќаат производот ако цената е различна од онаа на полицата и ретко ќе одат чекор подалеку и ќе побараат разговор со менаџер или контактираат со инспекција.

Законот за заштита на потрошувачите е дециден дека „трговецот е должен да ја истакне продажната цена на производите и услугите, а продажната цена на производите и услугите е конечна цена во која се вклучени сите даноци, придонеси и такси и еднакви на продажната цена од списокот на списокот.

-Разликата во цените на рафтовите и на касата, како и неуредните цени што потрошувачите не можат да „дознаат“, се еден од најпознатите, вообичаени проблеми со кои потрошувачите се соочуваат во трговијата. Но има и трговци кои свесно манипулираат со цените, како што се случува во изминатите денови, бидејќи не им е мило што мораат да продаваат поевтино, па макар и за неколку денари – велат експертите, со кои разговараше „Слободен печат“.

Според ССМ, вредноста на синдикалната минимална кошница за октомври 2024 година изнесува 61.249 денари и во споредба со вредноста на синдикалната минимална кошница за септември, нејзината вредност е намалена за 57 денари. Од ССМ сметаат дека мерката на владата за ограничени маржи дала делумни резултати поради алчноста на трговците кои ја пресретнале мерката со зголемени цени на производите.