Македонската ракометна сениорска ракометна репрезентација денеска во својот прв натпревар од групата „А“ на Европското првенство на фудбалскиот стадион во Диселдорф загуби од Франција со 39:29 (17:13).

На овој меч беше остварен историски рекорд по број на посетеност на ракометен натпревар со вкупно над 53.000 илјади гледачи на трибините.

Македонија предводена од селекторот Кирил Лазаров добро го почна мечот во „Меркур Шпил Арена“, беше рамноправна во првите 15-20 минути против еден од фаворитите за освојување на медал.

Французите беа изненадени од нашите напади реализирајќи преку Талески и Џонов. Противникот возвраќаше брзо, но и поради таа преголема нивна брзина правеа и грешки кои ги користеа нашите ракометари.

И Митревски имаше низа одбрани спречувајќи неколку чисти шанси на „триколорите“,  иако имавме негатива од 4:2, се вративме резултатски и израмнивме на 6:6, а потоа и поведовме. По грешката на Велковски ривалот ја врати минималната позитива (8:7).

Македонија во следниот период беше репрезентацијата која одржуваше предност, најпрвин од 9:8, Кузмановски се погрижи и за 10:8, а играчот на Еурофарм Пелистер имаше шанса и за „плус три“, но неговиот удар беше одбранет.

Следуваа четири наши напади без погодок, Дескат на спротивната страна беше незапирлив, казни за 11:10. Шест минути бевме без гол, а Франција како „брз воз“ доаѓаше до реализација, воедно и ја зацврстија одбраната што принуди да правиме повеќе грешки во нападот. На паузата Франција замина со водство од 17:13.

Во второто полувреме Франција одигра уште подобро, не го промени својот стил на игра, „триколорите“ со своето искуство и квалитет веќе стекнаа и „плус пет“ (20:15). Митревски продолжи со своите одбрани, но во нападот едноставно сè потешко доаѓавме до нови голови, иако се разиграа и пивотите Пешевски и Лазаревски.

Франција веќе дојде и до седум голови разлика (27:20), и полека сите дилеми се решаваа околу победникот и се чекаше во финишот во кој имавме и „двоцифрена негатива“ (37:27). Следниот меч Македонија ќе го игра на 14 јануари во Берлин против уште еден фаворитот, домаќинот на ЕП, Германија, со почеток од 20.30 часот.

Европско првенство 2024

Група „А“, прелиминарна фаза
Македонија – Франција 29:39 (13:17)

Македонија: Никола Митревски (11 одб.), Мартин Томовски, Едвин Омерагиќ, Мартин Велковски, Марко Митев 3, Филип Талески 3, Никола Маркоски 1, Филип Кузмановски 4, Ненад Костески, Никола Костески 1, Жарко Пешевски 7, Томислав Јагуриновски, Милан Лазаревски 4, Иван Џонов 6, Петар Атанасијевиќ, Давид Савревски.