Пари Сен Жермен со победата над Сиетл саундерс (2:0) во последното коло од групната фаза на Светското клупско првенство си обезбеди пласман во осминафиналето, каде што ги чека Интер Мајами. Но, тренерот на европскиот шампион, Луис Енрике, не беше задоволен, напротив ги критикуваше условите за игра во САД.

По натпреварот одигран на „Лумен Филд“ во Сиетл, шпанскиот стратег јавно ја искажа својата фрустрација, особено поради лошиот квалитет на теренот.

„Иако победивме, морам да истакнам дека состојбата на терените на ова првенство е под секое ниво. Овде не може да се игра фудбал. Тревниците се далеку зад европските, топката отскокнува како зајак. Сега игравме на терен што претходно бил вештачки, а сега е природен. Се полева рачно и се суши за десет минути“, изјави Енрике.

Тој додаде дека ова не е никакво оправдување, туку реален проблем на кој ФИФА мора итно да реагира.

„Не можам да замислам НБА натпревари да се играат на паркет со дупки, а ние овде мораме да играме на вакви терени. Топката не се однесува како фудбалска топка, туку си прави „што сака“. Ако веќе толку сме принудени да критикуваме, тогаш е јасно дека нешто треба да се смени“, изјави Енрике.

Претходно условите за игра на турнирот во САД ги критикуваше тренерот на Борусија Дортмунд, Нико Ковач кој се пожали и на високите температури.

ВИДЕО | ПСЖ и Ботафого во осминафиналето, елиминиран Атлетико Мадрид

Уште еден циркус на Светското клупско првенство: Резервите на Борусија натпреварот го гледаа од соблекувална