Енергетскиот експерт и прв претседател на регулаторната комисија Славе Ивановски се согласува дека треба да има разногласие, но со аргументирани ставови, а неговата оценка е дека аргументите кои биле изнесени против Чебрен биле целосно погрешни, па дури и на штета на интересите на државата.

Во гостувањето во „Студио 10“ на ТВ24 тој кажа дека „Чебрен заврши како што заврши“ и дека не е сигурен дали повторно ќе може да се активира тој проект.

– Гледаме дека во регионот засилено се градат хидроелектрани од таков вид. Не знаеме дали Чебрен ќе биде конкурентен. Во Србија и Бугарија се градат, а во Грција има три такви со иста сила како што требаше да биде Чебрен, изјави Ивановски.

Што се однесува до инвестицискиот проект на „Митилинеос“, тој рече дека се работи за лидер во Европа, фирма што работи на пет континенти.

– Тие работат во секторите енергетика и металургија и се најголем произведувач на алуминиум во Европа. Има 2.050 мегавати инсталирана енергија во вакви постројки во Грција и имаат над 3.500 вработени, изјави Ивановски.

Неговиот став е дека не може ваквите големи инвеститори да нѐ чекаат, како што вели, ние да ги надминеме нашите фрустрации, бидејќи капиталот ќе го инвестираат на друго место.

– Ваквите големи компании се подложни на правилата кои се следени од берзите и инвестициските фондови. Ако некој компанија влезе во коруптивна шема, тоа ќе биде хаос за нив, рече Ивановски и додаде дека „Митилинеос“ и АКУО се одговорни компании кои нема да влезат во коруптивна шема, а должност ѝ на државата е да ги заштити од такви шеми.

Во однос на АКУО, пак, аргументираше дека ние од нив ќе откупуваме струја за 56 евра за мегават, а во Косово на тендер никој не понуди под 65.

– АКУО нуди цена од 56 евра за мегават час од фотоволтаичната централа, цена која веројатно ќе се адаптира, како што е пракса, согласно инфлацијата. Косово пред пет месеци објави тендер за 100 мегаватна фотоволтаична централа, каде првата цена за негативната аукција беше 65 евра и никој не се пријави, изјави Ивановски.