Еминем одлучи да му се спротивстави на технолошкиот гигант. Раперот и неговата издавачка куќа „Eight Mile Style“ поднесоа тужба против „Meta Platforms“, сопственикот на „Facebook“, „Instagram“ и „WhatsApp“. Тие го обвинуваат технолошкиот гигант за повреда на авторски права и бараат отштета од над 109 милиони долари, според судските документи поднесени на 30 мај, пишува „Пипл“.

Во тужбата, Еминем (Маршал Матерс) тврди дека „Мета“ ги прекршила авторските права на 243 песни од неговиот каталог со „неовластено складирање, репродукција и експлоатација“, користејќи ги на нивните платформи. Како примери ги наведува функциите „Оригинално аудио“ и „Рилс“ на апликациите, кои „им овозможуваат и ги охрабруваат корисниците да ја крадат неговата музика“ за видео содржина „без соодветно наведување на изворот или лиценца“.

Затоа, Еминем бара парична отштета за „намалената вредност на авторските права поради нивното присвојување, изгубената заработка и профитот остварен од обвинетите преку повредата“. Алтернативно, тој бара максимална законска отштета од 150.000 долари за секоја од спорните песни на сите три платформи на „Мета“, што вкупно изнесува неверојатни 109.350.000 долари.

Музичарот е познат по својата конфликтна природа и често се осврнува на својот личен живот во своите песни, вклучувајќи го тешкото детство и турбулентните врски со неговата покојна мајка Деби Нелсон и поранешната сопруга Ким Матерс. Всушност, тој претходно забележал дека уметничкото изразување имало позитивно влијание врз неговото ментално здравје.

„Една од одличните работи кај рап музиката е што можете да внесете толку многу од вашиот сопствен живот во неа“, рече тој во емисијата „Sway In The Morning“ во јуни 2022 година. „Терапевтски ми делува, отсекогаш било така за мене.“