Елиф Елмас сезонава во дресот на Наполи имаше клучен придонес во натпреварите од Серија А на патот кон титулата која е многу блиску.

Македонскиот репрезентативец во 41 настап до сега запиша шест голови и три асистенции. Последната асистенција ја имаше на дербито во Торино кога „наполитанците“ во финишот триумфираа над Јувентус со 0:1, со погодокот на Џакомо Распадори.

Нашиот фудбалски „дијамант“ во интервјуто за „Радио Кис Кис“ вели дека тимот не размислува на Скудетото, туку само на следниот меч, а тој ќе биде против Салернитана на 29 април.

– До последниот натпревар сакаме да го дададе максимумот, како и секогаш. Имаме одличен шампионат, сакаме да продолжиме по тој пат. Доаѓаме од мали земји, како Македонија, Косово, Нигерија, како дете никогаш не сум помислувал дека би можел да го освојам Скудетото. Тоа е остварување на сонот – вели Елмас.

Елмас зборуваше и за голот против Јувентус, за кој сподели еден интересен детал.

– Само го чекав додавањето на Зиелински, бидејќи веќе го видов Осимен напред. Го забележав Распадори, со тој центаршут требаше само да постигне гол, ми вети дека ако му асистирам ќе ми даде 500 евра. Затоа бев посреќен поради тоа, само се шегувам, но сè уште ги чекам парите – рече Елмас.