Од сега точно ќе се знае кој регион колку средства добил и за што ги потрошил. Ваквата пракса за следење на вложувањата во регионалниот развој ќе започне откако ќе биде спроведен електронскиот систем СиРеРа за кој е задолжен кабинетот на вицепремиерката Мила Царовска.

-Преку мојот Кабинет се воспоставува електронски систем во кој вложувањата во рамномерниот регионален развој кои се одвојуваат во сите области каде државата финансира на локално ниво, ќе се собираат на едно место. Програмите ќе се прават по еднакви стандарди и на тој начин, кога ќе се креира буџетот за 2021 година ќе можеме детално да видиме во кој регион колку се вложило, во која област, рече Царовска по седницата на Управниот одбор на Проектот за изработка и воведување систем за координација во планирањето, спроведувањето, мониторингот и евалуацијата на политиката за рамномерен регионален развој (СиРеРа).

Според неа, државата првпат добива јасна слика за вложувањето во регионалниот развој и има можност сите програми да ги адаптира на потребите – онаму каде што најмалку се вложувало, сега да се вложува повеќе со цел сите граѓани и деца да добијат еднаков пристап и до услуги и до развиени региони.

Вицепремиерката подвлече дека оваа стартна позиција што сега е проект, ќе треба понатаму да се раководи преку институциите и да даде јасна слика кој регион е повеќе, а кој помалку развиен.

Министерот за локална самоуправа Горан Милевски кои исто така присуствуваше на седницата на Управниот одбор, напомена дека се работи за проект вреден пет милиони швајцарски франци од кои 3,3 милиони се швајцарска донација, а останатите се средства обезбедени од македонската Влада. Генерално, поддршката е за планските региони и центрите на планските региони со иновативни проекти, но можно е и пренасочување на средствата зависно од потребите на граѓаните.